لحتى تضل ابتساماتكم مشرقة وما تعتازونا بكرة بالمستقبل.. هي شوية نصائح:
1-راقب معجون أسنانك: تأكد أنو نسبة الفلورايد بمعجون أسنانك بتتراوح بين (1100-1500) جزء في المليون لا أكتر ولا أقل , ولحتى تعرف هالنسبة بحبش ودور على عبوة المعجون ولازم تلاقيها, فإذا ما لاقيتها معناها هالمعجون خطير على حياتك!!! قصدي أسنانك..

2-استخدم قبضة الأصابع في تنظيف أسنانك وليس قبضة الكف: يعني مو يمسك الواحد فرشاية السنان وكأنو ماسك خنجر وإنما كما لو أنو ماسك قلم أو ريشة.. ليش؟؟ لحتى ما تحف سنانك أو تخرشها.. وهون بحب نبهكم إلى أنو بعض معاجين الأسنان وخاصة يللي بتبيّض الأسنان (مو اللي بتبيض متل الجاجة!) فيها حبيبات صغيرة مخرشة للأسنان, وبرغم أنو هالمعاجين بتبيّض الأسنان آنياً لكنها بتخرشها, ومع مرور الوقت رح تقل ثخانة السن ورح يصير أكثر عرضة للنخر..
3-سمعت من البعض أنهم (ما شاء الله عليهم) بينضفوا أسنانهم من فترة لفترة بعصير الليمون الطبيعي مع رشة ملح الليمون.. وفعلاً بهالخلطة العجيبة كانت أسنانهم تطلع تحفة! بس بالحقيقة الأسنان بهالطريقة بتتخرش وبتنأذى خاصة على المدى الطويل..

4-ديروا بالكم عاللثة وإلا.... بتختيروا على بكير وبهروا سنانكم.. فلا تعرضوا اللثة للرضوض قدر الإمكان وتجنبوا انحشار الطعام بين أسنانكم لأنو يؤذي اللثة.. وبيسبب مع الوقت تراجع لثوي..

سأكتفي بالنصائح السابقة كي لا أطيل.. وإذا كنتوا مهتمين بكتبلكم غيرها..

وان شاء الله بتضلوا فرفوشين ضاحكين مبسوطين ... بوجودي